كِشْ مَلِكْ .
------------------------
- ياااااه ؛ اخيراً يا عم .. بقالنا كتير لا قعدنا و لادردشنا زى زمان ؛ فينك كل ده .
- معلش بقى ظروف الحياة و مشاغلها انت عارف .
- مشاغل ايه بس دى اللى تخليك تنسانى ؛ على العموم انا مش هعاتبك و لا هتكلم كتير .. انا بس هقولك انى من ساعة ما كلمتنى و قلت لى انك جاى و انا حضرت الشطرنج و كوباية الشاى بالنعناع ع النار :D
- ياااااااااااه انت لسة فاكر ؛ و انا جاى فى السكة كنت بقول اكيد هاجى الاقيك محضرهم بس قلت لنفسي احتمال كبير تكون نسيت ؛ اليومين دول الناس بقت بتنسى كتير اوى .
بتنسى الصحاب و الجيران و العيش و العشرة ؛ حتى الاخوات بينسوا بعض .. تصدق !!
- مالك بس يا عم شكلك شايل من الدُنيا اوى ؛ تعالى بس نقعد و نتكلم .. تعالى
_______________________________________________________________
- بص بقى قبل اى حاجة و من اولها كالعادة انا اللى هكسب طبعاً ف ما تفضلش بقى تقولى لا و انا ماخدتش بالى من الحركة دى و الكلام ده كله ماشى
- ههههههه ؛ لا يا سيدى مش هقولك بس برضه من اولها بقولك ما تسألنيش عن اى حاجة سيبنى احكى كده و خلاص
- طيب و انا مش هسأل ؛ الا يعنى لو حاجة لفتت نظرى اوى فى الكلام :|
- مش هرد عليك ؛ انا ايه اصلاً اللى جابنى هنا انهاردة :D
- العشرة يا صاحبى ؛ و العيش و الملح و كل الحاجات اللى انت قلت الناس بقت بتنساها .. بس انت اهو لسة ما نستهاش مع انك واحد من الناس :D
_________________________________________________________________
- طول عمرى بسمع الناس بتقول اصعب احساس على الواحد هو احساس الغُربة ؛ و هو بعيد عن اهله و ناسه .
بس غُربته و هو وسط كل دول طلعت اصعب اوى .
- ايه بس يا صاحبى الكلام الكبير ده (حرك عسكرى)
- صدقنى يا صاحبى دى الحقيقة ؛ انا جربت ده و جربت ده .. (حرك عسكرى)
و انا وسطهم كنت بستنى كلمة واحدة تشجعنى .. تحسسنى ان شوية الأمل اللى جوايا ليهم لازمة !
انت فاشل ؛ فاكر نفسك هتنجح ؛ يابنى دى بلد وسايط فوق .....
دورك .
- (حرك عسكرى خطوتين) ها .. كمل
- بس يا سيدى ؛ قصة معروفة و بتتكرر كتير ؛ ما انت ياما سمعتها معايا .
الامل مالوش صاحب اسمه الاحباط ! عارف المثل بتاع ان دخل الفقر من الباب ينط الحُب من الشباك .. اهو نفس القصة ؛
ان دخل الاحباط من الباب انتحر الامل من شباك فى الدور العاشر !
ان دخل الاحباط من الباب انتحر الامل من شباك فى الدور العاشر !
(حرك طابية)
- طب و الحل كان فى السفر ؟! (فكر شوية و حرك الطابية)
- لو عليا ما كنتش اخترته ؛ و انا من امتى كنت بختار ؟!
دراستى ما اخترتهاش ؛ مستوايا المادى ما اخترتوش ؛ حتى احلامى ما عرفتش اختارها .
- طب و أمل ؟
- أمل .. أمل كانت اسم على مُسمى بس برضه ماكنش ينفع اختارها ؛ انا لا انا على ابن الجناينى ولا هى انجى بنت الاكابر ؛
و زمن عنترة ابن شداد انتهى خلاص .
(حرك حصان)
- ابوك هو اللى صمم انك تسافر؟ (حرك حصان)
- ابويا !! ابويا ده اطيب خلق الله ؛ كل تحويشة عمره سلمهالى عشان السفرية دى .
كنت بشوف فى عنيه كسرة طول الوقت ؛ كان دايماً يقولى و الله يا ابنى كان نفسى اعملك كل االى بتحلم بيه و ما تضطرش تتغرب ثانية ؛
بس ادى الله و ادى حكمته !
بس ادى الله و ادى حكمته !
(حرك فيل)
- كمل (حرك فيل)
- بس هكمل ايه !
الغُربة فى عرض البحر وحشة اوى ؛ اول مرة كنت اقعد فيها بجد مع نفسى .
كنت حاسس ان حياتى ماشية فى خط واحد ؛ سيناريو واحد نهايته ثابتة بيتكرر كل يوم ؛ بصحى بـ حلم قبل ما انام يكون مات !!
ببص لبكرة .... مش شايف حاجة !!
(حرك طابية)
- هههههههههههههه ؛ انت كل مرة كده يا ابنى .. كِشْ مَلِكْ .
- كِشْ مَلِكْ .
تصدق هو ده اللى حسيته وقتها بجد .. هو ده اللى انا حاسه دلوقت ..
مش عارف هحسه برضه قدام ؟!!
بس برضه تصدق يا صاحبى ؛ اول مرة اسمعها احسن انى مرتاااح كده ..
كل حاجة خلصت ؛ حاسس او يمكن متأكد ان دى اخر مرة هسمع الجُملة دى !!
______________________________________________________________________
القناة الاولى .. نشرة اخبار الساعة السادسة ..
فى حادث مُفجع لقى عشرون شاباً مصرياً مصرعهم غرقاً بالقرب من سواحل ايطاليا فى محاولة جديدة من سيناريو الهجرة الغير شرعية .
القناة الثانية .. برنامج (..) ..
خبير سياسى 1 : الشباب ده محتاج اعادة تاهيل نفسى عشان ما تتكرش الحوادث دى و بدل ما يخاطروا بحايتهم كانوا يشتغلوا فى بلدهم
خبير سياسى 2 : انا بختلف مع حضرتك ؛ دول ضحية مجتمع و نظام فاسد
خبير سياسى 3 : النظام الفاسد مش مبرر لفساد الاسرة اللى بتسمح لابنها يُقدم على المغامرة دى
خبير سياسى 4 : ................................
خبير سياسى 5 : ............................................
..............................................................................................
حلو قوى على فكرة الأسلوب والسردبتاعك ده
ردحذفقدرتى بكل بساطه وتلقائيه فى قعدة صحاب على الشطرنج تحكى مشكله جيل بحاله تايه ومحبط ومش عارف يروح فين
ياريت فعلا الامل الى ذكرتيه فى تدوينتك يتولد ويكبر ويبقا شيئ ملموس نقدر نشعر بوجوده
شُكراً جزيلاً
حذف